AzQAC Vineyard-ın dəstəyi ilə "Yaxşılıq Yarat" adlı xeyriyyə və əyləncə xarakterli tədbiri keçirilib

4 Yanvar 2025-ci il tarixində “Vineyard Sumqayıt” Xristian dini icmasının təşkilatçılığı və “Həyat Mənbəyi” Xristian dini icmasının təşkilati dəstəyi ilə, Sumqayıt şəhərində yerləşən Sumqayıt Gənclər Evində növbəti dəfə “Yaxşılıq Yarat” adlı xeyriyyə və əyləncə xarakterli tədbir keçirilib.

Tədbirin məqsədi II Qarabağ müharibəsinin şəhid və qazi övladlarının, məhdudiyyətli və internat uşaqlarının, eləcə də az təminatlı ailələrin övladlarının üzlərində təbəssüm yaratmaqdır. İcmanın sədri Kamran Ağayev bildirib: “Hər bir körpə Azərbaycan üçün uğurlu bir gələcək, potensial bir ailədir. Arzumuz budur ki, bizim yeni nəslimizin qəlbi Tanrı sevgisi, vətənə sədaqət və böyüklərə ehtiram hissi ilə dolsun.”

Tədbirdə Azərbaycan Qızıl Aypara Cəmiyyəti-nin Xocavənd rayonu nümayəndəliyi, “Həyat Mənbəyi” Xristian dini icmasının nümayəndələri və “Xüsusi Uşaqlar üçün İnteqrasiya Mərkəzi” nümayəndələri iştirak ediblər.  Tədbirin bədii hissəsində, robot şou, alov şou, köpük şou və şar şou kimi müxtəlif əyləncəli proqramlar uşaqların xüsusilə diqqətini çəkib.

Konsert proqramı zamanı, Vineyard Azərbaycan Xristian dini icmasının uşaqlar üçün dərc etdiyi, Dini Qurumlarla İş üzrə Dövlət Komitəsinin markalı “Müqəddəs Yazıdan Hekayələr” kitabının təqdimat mərasimi keçirilib və kitablar uşaqlara hədiyyə olunub. Sonda uşaqların hər birinə  hədiyyələr verilib.